Um frístundaheimilið Brosbæ

Frístundaheimilið Brosbær er staðsett við Vættaskóla-Engi í Grafarvogi. Brosbær er eitt af átta starfandi frístundaheimilum sem tilheyra frístundamiðstöðinni Gufunesbæ.

Frístundaheimilið er staðsett í anddyri Vættaskóla-Engjum. Erum við með þrjú rými, tvö á neðri hæð skólans sem við köllum Hjartað og Kósýbæ og eitt á efri hæð þar sem eldri börnin eru og hafa þau nefnt rýmið Regnbogatorg. Einnig höfum við aðgang að bókasafni, tölvustofu, heimilisfræðistofu og íþróttahúsi. Síðdegishressinguna snæða börnin í matsal skólans.

Við leggjum áherslu á barnalýðræði í starfsemi okkar þar sem börnin velja sjálf hvað þau leika með og hverju þau taka þátt í, hafa þau einnig áfrif á hvað keypt er inn af leikföngum. Boðið er uppá skipulagða dagskrá fyrir alla aldurshópa og það er val barnanna hvort þau taki þátt í dagskránni eða séu þá í frjálsum leik í Brosbæ. Innra skipulag er byggt upp þannig að yngstu börnin fá mest frjálsan leik en tilboðum fjölgar svo eftir því sem þau verða eldri og einnig á vorönn. Hópa-og klúbbastarf er sniðið eftir aldri og þroska barnanna en einnig eftir áhugasviði þeirra.

Hálfsmánaðarlega erum við með barnaráð sem fær að ráða einum degi í komandi viku. Þá er dregið í ráðið á barnafundi sem haldinn er með öllum börnunum aðra hvora viku, barnaráð fundar undir lok vikunnar og komast að sameiginlegri niðurstöðu um hvað á að gera og  hvaða þema verður í gangi daginn sem þau velja. Öll börn frá 2. – 4. bekk  í Brosbæ fá að sitja einu sinni hvern vetur í barnaráði.