Frístundaheimilið Kastali er staðsett við Húsaskóla í Grafarvogi. Kastali er eitt af sex starfandi frístundaheimilum sem tilheyra frístundamiðstöðinni Gufunesbæ.

Frístundaheimilið er staðsett í stofum 2, 3 og 4 í skólanum. Einnig höfum við aðgang að hátíðarsal og stofu 47. Síðdegishressinguna snæða börnin fyrir framan eldhús Kastala, í matsal skólans.

Við leggjum áherslu á barnalýðræði í starfsemi okkar þar sem börnin velja sjálf hvað þau leika sér með og hverju þau taka þátt í. Boðið er uppá skipulagða dagskrá fyrir alla aldurshópa og það er val barnanna hvort þau taki þátt í dagskránni eða séu þá í frjálsum leik í Kastala. Innra skipulag er byggt upp þannig að yngstu börnin fá mest frjálsan leik en tilboðum fjölgar svo eftir því sem þau verða eldri og einnig á vorönn. Hópa-og klúbbastarf er sniðið eftir aldri og þroska barnanna en einnig eftir áhugasviði þeirra. Oft er boðið uppá ýmsar skemmtilegar smiðjur og fá börnin frjálsar hendur í að skapa það sem þeim langar með aðstoð starfsmanna.

Tilgangur frístundaheimilisins er að veita börnunum tækifæri til að stunda frístund við þeirra hæfi. Í Kastala læra börnin að vera vinir, góð hvert við annað og hvernig á að leika sér fallega.