Í gær, þriðjudaginn 3. desember, var Góðgerðamarkaður frístundaheimila Gufunesbæjar haldinn í 8. sinn. Að venju lögðu margir leið sína í Hlöðuna við Gufunesbæinn til þess að kaupa alls kyns föndur og góðgæti sem börnin eru búin að vera að útbúa undanfarnar vikur. Elstu börnin standa vaktina við afgreiðslu á markaðnum og með sanni má segja að þau stóðu sig frábærlega í því hlutverki í dag. Ágóðinn af sölunni rennur óskiptur til Barnaspítala Hringsins og munu fulltrúar heimilanna fara þangað á næstunni til að afhenda tæplega 400.000 krónur sem söfnuðust að þessu sinni. Frístundaheimilin þakka öllum sem komu á markaðinn og lögðu þessu góða málefni lið.