Þriðja bylgja faraldursins er enn í fullum gangi og ýmsar takmarkanir enn í gildi. Sem betur fer þurfa grunnskólar ekki að takmarka starfsemi sína of mikið, en í fyrstu bylgjunni var raunin önnur. Margir grunnskólanemar gátu ekki mætt í skólann nema í nokkrar klukkustundir á viku og félagsmiðstöðvar neyddust til að vera með rafrænar opnanir.
Hvernig er staðan í félagsmiðstöðvunum í dag og hvernig eru krakkarnir að takast á við þetta allt saman? Við spjölluðum við forstöðumenn félagsmiðstöðvanna í Gufunesbæ um málið.
Gestabann og grímur á daginn
Ólíkt stöðunni í vor þá starfa félagsmiðstöðvar að mestu eins og venjulega. Það er gestabann í öllum félagsmiðstöðvunum og íþróttasalurinn er lokaður sem er í takt við reglur skólanna.
Áslaug, forstöðumaður í Fjörgyn, segir flest venjulegt fyrir utan að ákveðið var að fresta gistinótt sem átti að vera í haust. „Annars erum við bara að sleppa baksturs- og matreiðsluviðburðum. Þegar við erum með snakk í boði þá eru allir með sína eigin skál og við skömmtum í þær með hönskum og grímum.“
„Á dagtíma erum við með skólanum í því að vera með grímur á almannafæri,“ segir Njörður, forstöðumaður í Sigyn. „Annars hugum við bara að sóttvörnum, sótthreinsum áhöld og allt eftir lokun.“
Stefán í Vígyn segir flest vera eins og venjulega nema að fresta þurfti einum 10-12 ára hitting, því þar hefðu tveir skólar hist.
Góð mæting en mismunandi stemning
Það er svipað hljóð í krökkum félagsmiðstöðvana. „Mæting er rosalega fín og ég held að það sé bara allstaðar,“ segir Njörður. „Það er lítið að gera fyrir þau á kvöldin út af því að það eru engar æfingar. Það er bara mjög gaman að hafa þennan fjölda og meira stuð.“‘
Stefán segir smá pirring vera í krökkunum vegna þess að þau geta ekki farið í íþróttasalinn. „Það er alveg pínu æsingur á kvöldin. Annars er ágætt hljóð í þeim.“
Áslaug segir krakkana ekki endilega nógu meðvituð um eigin smitvarnir. „Þau eru bara hress, sem er gott, en þau eru ekki alveg endilega að átta sig á hvað þau þurfa að gera. Við starfsfólkið erum bara búin að skerpa meira á öllum smitvörnum.“
Njörður lýsir ánægju sinni að hafa meira fjör í félagsmiðstöðinni. „Það er smá gott í þessu alheimshallæri. Ég er ótrúlega feginn að geta verið með opið í staðinn fyrir að vera með rafræna hittinga.“